Ciwan Haco Behr Bê Pêl Nabe - Omer Faruk Baran

 

Kerem bikin Bihuşta Cegerxwîn: Omer Faruk Baran li ber strana "Behr Bê Pêl Nabe" ya Ciwan Haco nivîsî, Evdî Hesqera xwend.

Ciwan Haco Behr Bê Pêl Nabe - Omer Faruk Baran

(https://perxudres.blogspot.com/2020/1...​)

I.

te ji vê stranê pir hez dikir 

û ku te çi wext vedikir stran 

bêmane, pê re sor dibûn sûrên Diyarbekir 

em li berbanga berbanê, hilakî 

siberoja me hinekî poşman, stûxwar

li mêvandarî û mazubaniya li mala hevalan 

fedîkar, me li xwe dipêça şeva tarî, şeva har 

te cixare nedikişand tema

û te nedihîşt ku ez jî bikişînim

serê te li ser milê min ê rastê 

şerê me, çep dilên me çep, kutekut û kuxtekux 

min bi ê xwe dikir ha, dikişand cixare, bi mêranî! 

bi azana sibê re, bi ser me de dihatin ol û dîn 

min digo metirse em ê herin bihuşta Cegerxwîn

em diçûn û li wir sankî li kezeba me diket ev stran 

xeyalên me dûr û giran giran 

rexneyên me li civaka cahil, civaka nezan

bihevşabûn bû, bi heft qat cil bû, ev para wan 

da ku nepijiqe ezûtuyekî xwînî ji nav nivînan 

ewê ku xwe tenê sipartibû

çend ramûsan û çend gezan 

II. 

te ji vê stranê pir hez dikir 

loma min digo dîsa lêxe hele 

pencere perde, cîran nabînin me

heval bi xwe nehisiyane, me nabihîsin 

serê sibê em ketine bextê saet heftan 

zû ke de, em nesekinin herin ji van deran 

li ber stranê taşte hazir dikir te, kebanî 

ez dibûm malxwe min diçû nan dianî 

li ser sifrê sermestiya mîrat awirê min î feodal 

te dida serê xwe desmal, çavên te henûn 

çay, penîr û çend heb zeytûn 

III.

bêbixatirêwe em derdiketin ji qesra mîr û periyan 

kîjan eşqê xwe

neqelibandibû li malên xwendekaran 

feraqên neşûştî, odeyên biçûk û

gemarî, bêhna genî 

bila qe, ez mîr bûm li wir tu jî perî 

mîna ku hukmê min li bajêr bibe 

û mîna ku li ba min nebîne kes te 

tirsa destên ne destgirtî 

gavên bi lez de lez, stranî 

kesî em nedidîn, me herkes didît çi bigir 

herkes nas, herkes dost, herkes dijminê eşqê 

li ku bibînin me, dikin biavêjin feqê 

tu hema siwar dibûyî li wê dolmişê,

diçûyî bê veger 

lêdiket ev strana jî, li dû te

di guhên di ber devî rê de 

mişt tenêbûn, mişt tinebûn, mişt keser 

çend peyv jê, jibîrbûyî 

te ji vê stranê pir hez dikir 

ez nizam tu hîn jê hez dikî yan na 

ez zanim ez hîn jê hez dikim, ji te 

min ji vê stranê pir hez dikir 

tu nizanî ez hîn jê hez dikim an na 

ez zanim ez hîn jê hez dikim, ji te 

me ji vê stranê pir hez dikir 

em nizanin em hîn jê hez dikin an na 

ez zanim ez hîn jê hez dikim, ji te 

Dîyarbekir - Stenbol, 2013