Elbakof - Suat Baran | Li Ber Çapê




bêkok in her tişt 

bêkok in xanî, derî li ser piştê xîmê wan li bin erdê 
hirç gur û rovî tên xewnên me, pê de pê de 
em dileyzin pev re, dikenin û ditirsin, gurzî ji cendekê me radibe. 

bêkok in xewnên me, mil şikestî, ziman zirzekirî 
gelek kes li ber guhê me, barbariya kêfa wan me diêşîne 
em dimirin pev re, dialisin birînên hev û ranazin. 

bêkok in bîranînên me, dîmen şêlû, deng kerr, bêhn çikiyayî 
kî hebû tevde mirine, naxwazin em deng bidin di heyata wan de  
em dikujin pev re, çi kesî nahebînin, şad û bextewar in bi serê xwe. 

bêkok in hewşên me, ne ajalek tê de digere ne lê vedigere mirovek  
nema kes berxika berdide beriya şîrdotînê,  
nema li bêhna yadê digerim li guhanên pezan 
min tiştek nema ji wan deman, wan deveran, windayî me li aloleyên sasaniyan – 

kes nizane dirûvê kê bi min dikeve, di yê kê de veşartî me ligel hemî perrikan 
alfa û omega – ligel hemî şikestinan, hemî diayan. 

min tenê, 
di xewnên xwe de mezin kirine ev 
yek bi yek, 
xewnên dûkel û xweliyan.

📻 AŞ Û BAŞ

📻 LI SER PÊYAN, ÇEND KELAM


📧hurbini1@gmail.com
Her mazûvan û berhemdar ji naveroka xwe berpirsîyar e.